Американскиот суд го одби барањето на Бритни Спирс нејзиниот татко да се отстрани од позицијата нејзин старател. Џејми Спирс е законски старател на својата ќерка веќе 12 години, поради загриженоста за нејзиното ментално здравје.

Самјуел Ингам, адвокатот на поп ѕвездата, изјави дека Бритни се „плаши“ од својот татко како и дека нема да настапува се додека тој е на таа позиција.

Адвокатот на нејзиниот татко тврди дека Џејми секогаш постапувал во најдобар интерес за својата ќерка. Судијата изјави дека ќе ги разгледа идните жалби за негово отпуштање или целосно отстранување.

Во меѓувреме, на барање на Бритни Спирс, финансиската компанија „Bessemer Trust“ е именувана за ко-старател.

Во текот на сослушувањето во вторникот, Ингам изјави дека таа и нејзиниот татко немаат „одржлив однос“ и дека тие „долго не разговарале“.

Но Вивијен Торин, адвокатот на Џејми Спирс, тврди дека причината за тоа дека не разговарале е што господинот Ингам ја советувал Бритни да не комуницира со нејзиниот татко.

Госпоѓата Торин исто така го бранеше начинот на работа на Џејми Спирс како грижлив и посветен старател.

Правната битка се одвива во позадина на движењето „Ослободете ја Бритни“ – на групата обожаватели кои веруваат дека Бритни ја држат во заробеништво како нејзиниот татко така и други учесници во овој процес.