Австриската влада предлага нов закон со кој ќе воведе данок за пакетите што се продаваат преку големите онлајн платформи, а мерката веќе предизвика силни реакции кај трговците, економистите и потрошувачите. Според предлогот на Министерството за финансии, секоја испорака на пакет до краен потрошувач ќе биде оданочена со две евра, доколку продажбата се врши преку големи интернет-компании или платформи што имаат значителен промет. Владата очекува дека со оваа мерка во државниот буџет ќе се слеат околу 280 милиони евра годишно. Новиот данок е дел од поширокиот план за финансирање на намалувањето на данокот за основните прехранбени производи, мерка која треба да стапи во сила од јули следната година. Иако владата тврди дека со новата политика сака да воспостави поправеден систем и да го заштити домашниот пазар, критичарите предупредуваат дека трошокот на крајот ќе го платат граѓаните преку поскапи нарачки и дополнителни давачки.

Данок за онлајн испораките

Според предложениот закон, данокот ќе се применува за сите пакети што ги испраќаат големи компании како Амазон, Тему и други интернет-платформи кои остваруваат повеќе од 100 милиони евра годишен промет во областа на онлајн продажбата. Во мерката ќе бидат опфатени и неколку австриски компании што работат преку интернет-продажба. Данокот нема да важи за приватни лица кои продаваат меѓу себе преку платформи како Вилхабен, ниту за купувања направени директно во продавница, по што производот дополнително се испраќа до купувачот.
Министерството за финансии наведува дека електронската трговија во последните години доживеала огромен раст и дека бројот на доставени пакети во Австрија драматично се зголемил. Според податоци на Австриската пошта, само во 2025 година биле доставени околу 232 милиони пакети, што е раст од 3,5 проценти во споредба со претходната година. Анализите на пазарот покажуваат дека вкупниот број пакет-испораки во Австрија надминал 397 милиони, а главен двигател на растот се токму онлајн платформите како Амазон и Тему. Според владата, тоа создава дополнителен притисок врз инфраструктурата, животната средина и домашните трговци кои мораат да се натпреваруваат со големи меѓународни компании. Во објаснувањето на законот се наведува дека многу интернет-компании користат национална инфраструктура, но притоа не придонесуваат доволно во домашната економија.

Предлогот предвидува и одредени исклучоци. Данокот нема да се наплаќа во случаи на таканаречен систем, нарачај и подигни, кога купувачот го резервира производот преку интернет, но го подигнува лично во продавница. Исклучени се и случаите кога самата продавница лично ја доставува стоката. Сепак, постои можност за некои пратки да се наплатуваат повеќе од две евра, бидејќи компаниите однапред секогаш не знаат дали нарачката ќе биде испорачана во едно или во повеќе пакувања. Поради тоа, компаниите ќе можат да изберат дали данокот ќе го пресметуваат по пакет или по нарачка.

Нови мерки против даночни измами

Покрај пакет-данокот, австриската влада најави и проширување на мерките за борба против финансиските измами. Во рамки на новите реформи, Канцеларијата за борба против измами ќе добие пошироки овластувања за пристап до податоци од банкарскиот систем и од регистарот на сметки. Досега такви информации можеше да бара само финансиската администрација во одредени даночни постапки, но според новите правила институциите ќе имаат поголеми можности за контрола и проверка на сомнителни трансакции.

Дополнително се заострува и таканаречениот данок за иселување. Станува збор за обврска што се однесува на лица кои го префрлаат своето живеалиште во друга држава, а притоа поседуваат капитал, акции или друг имот чија вредност пораснала со текот на времето. Досега, доколку лицето се преселеше во друга земја членка на Европската Унија, постоеше можност данокот да се избегне со образложение дека имотот не бил продаден. Според новите правила, граѓаните ќе мора редовно да докажуваат дека капиталот навистина не е отуѓен.

Владата смета дека со овие мерки ќе се обезбедат дополнителни приходи и подобра контрола врз дигиталната економија, која последниве години расте побрзо од традиционалната трговија. Но дел од економските аналитичари предупредуваат дека новите давачки може да создадат дополнителен товар за потрошувачите и за малите компании кои зависат од интернет-продажбата. Во наредниот период законот ќе биде ставен на јавна расправа, по што треба да биде разгледан и во австрискиот парламент.