Арапските министри за надворешни работи денеска во Јордан се среќаваат со меѓународни претставници за да разговараат за иднината на Сирија – без присуство на Сиријци. Јорданското Министерство за надворешни работи соопшти дека целта на средбата била да се истражат начини за поддршка на земјата за време на транзициската фаза по падот на долгогодишниот лидер Башар ал Асад.

Целта на разговорите е да се гарантира инклузивен политички процес предводен од Сирија, кој ги вклучува сите групи во скршената земја.

Според јордански извори, на состанокот ќе присуствуваат министрите за надворешни работи на Јордан, Саудиска Арабија, Ирак, Либан, Египет, Обединетите Арапски Емирати, Бахреин и Катар. Арапските претставници треба да се сретнат со шефовите на дипломатиите на Турција и САД, Хакан Фидан и Антони Блинкен во градот Акаба.

Учествува и претставникот на ЕУ за надворешни работи, Каја Калас, како и специјалниот пратеник на ОН за Сирија, Геир Педерсен.