Лајза Минели отворено зборува за својот бурен и разновиден љубовен живот во своите мемоари „Деца, чекајте додека не го чуете ова!“, кои беа објавени на 10 март, во кои се детализирани нејзините четири брака и многуте романси што ја придружувале нејзината кариера.

За време на нејзиниот прв брак со австралискиот пејач Питер Ален, кој подоцна се изјасни како геј, Минели започна врска со Деси Арназ помладиот, син на Лусил Бол и Деси Арназ. Таа се присети на моментот кога ја откри тајната на Ален: „Еден ден се вратив рано дома од шопинг, влегов во станот и го најдов Питер како води страсна љубов. Со маж. Во нашиот кревет!“

Таа додаде дека тоа бил првпат нејзиниот сопруг да ѝ се изјасни.

– Додека другиот господин брзо се облече и исчезна, се чувствував кревко и исплашено… Потоа Питер дојде до мене и ме прегрна цврсто. Двајцата почнавме да плачеме. За првпат ми рече: „Лајза, те сакам повеќе од кој било на светот… и јас сум геј.“ – раскажува таа.

И покрај нивниот развод, тие останаа пријатели сè до неговата смрт од СИДА во 1992 година.

Додека сè уште беше во брак со Ален, нејзината врска со Арназ помладиот се разви во свршувачка во 1973 година. Сепак, истата година, по настап во Лондон, таа започна романса со легендата на комедијата Питер Селерс. Нивната врска траеше пет недели, но вклучуваше свршувачка „која траеше колку трепкање со око“, која се преклопуваше со нејзината свршувачка со Арназ и нејзиниот брак со Ален.

Во 1974 година, таа се омажи за својот втор сопруг, Џек Хејли помладиот, син на актерот кој го играше лимениот човек наспроти нејзината мајка Џуди Гарланд во „Волшебникот од Оз“. За време на тој брак, таа имаше бурна афера со Мартин Скорсезе, кој го режираше филмот „Њујорк, Њујорк“ од 1977 година.

– Нашата љубовна врска, да бидам искрена, беше слоевита како лазањи. И двајцата бевме Италијанци. Страсни. Интензивни. Посветени на нашиот занает. И двајцата имавме вулкански темпераменти. Тој беше пеколно згоден маж кој ја делеше мојата љубов кон филмот. Јас бев ќерка на режисерот – напиша Минели.

Нивната романса очигледно не заврши добро, бидејќи Скорсезе „се сврте од мене“ години подоцна, на доделувањето на Оскарите во 2014 година, кога таа се обиде да го поздрави.

Нејзиниот пријател Енди Ворхол го опиша нејзиниот љубовен живот како „комплициран“ во своите дневници, тврдејќи дека нејзината афера со Скорсезе се совпаднала со нејзината врска со познатиот балетски танчер Михаил Баришников, факт што Минели го потврди минатата година.

Во своите мемоари, таа се присети и на својата борба со зависноста во текот на 1970-тите.

– Бензодиазепини. Барбитурати. Амфетамини. Алкохол. Кокаин – рече таа, опишувајќи го периодот како „магла од дрога“.

По кратката врска со музичката ѕвезда на „Пипин“, Бен Верен, таа го започна својот трет и најдолг брак, со скулпторот Марк Гир, кој траеше од 1979 до 1992 година. За време на тој брак, таа очајно сакаше да стане мајка, но доживеа три спонтани абортуси, вклучувајќи и мртвородено дете во петтиот месец од бременоста.

– Секој ден се молев нашето дете да преживее, но тоа не беше судено да биде… До ден денес, не можам да зборувам за тие настани без тага и мака. Неможноста да станам мајка е трагедија што никогаш нема да ја преболам – откри таа во книгата.

Својот четврти и последен брак, со Дејвид Гест во 2002 година, го опиша како медиумски спектакл.

– Очигледно не бев трезна кога се омажив за тој кловн. Гест беше зборлест, сомнителен брокер кој носеше повеќе шминка од мене – напиша таа.

Таа го обвини дека го контролирал секој аспект од нејзиниот живот и дека наплаќал од нејзината кредитна картичка за нивната свадба, проценета на 3,1 милион долари. Бракот заврши со горчлив развод.

Додека ги пишуваше своите мемоари, Минели повторно се поврза со Деси Арназ помладиот.

– Одамна почнав да се извинувам за болката што му ја предизвикав. Но, Деси ме спречи. „Лајза“, рече тој, „се што се сеќавам е љубов. Те молам, остави сè друго. Јас сум.“ Вистински господин – сподели таа.

На крајот од книгата, актерката хумористично го опиша видот љубовен живот што го сака денес: „Идеално, би се забавувала со постар, елегантен маж кој се облекува убаво и е неверојатно богат. Потоа би се забавувала со 40-годишник кој е страствен за нешто. Не ми е гајле што е тоа. А потоа би се забавувала со 18-годишник кого го гледам двапати неделно, а не му го знам името.“