Повеќе македонски градови и вечерва се со сериозно загаден воздух, а состојбата е најалармантна во Струмица, каде се измерени 158 микрограми ПМ-2,5 честички на кубен метар воздух, што е за повеќе од шестпати над дозволеното ниво. Престојувањето на отворено во вакви услови се смета за „нездраво“ не само за ризичните групи, туку за сите луѓе.

Според податоците од пет мерни станици во Струмица кои ги собира веб-страницата Aqicn.org, екстремното ниво на загадување е забележано на мерното место кај училиштето „Никола Вапцаров“, вечерва во 22 часот. Загадувањето на тоа место нагло се зголемило попладнето околу 17 часот и растело цела вечер. И на другите мерни станици во Струмица се забележани високи концентрации на ПМ2,5 честички, неколкукратно поголеми од дозволената.

Воздухот е значително загаден и во повеќе други македонски градови: Кавадарци, Тетово, Кичево, Гостивар, Скопје…

Воздухот вечерва е многу загаден во низа македонски градови, дури и во Охрид не се дише