Исклучително високо ниво на загадување на воздухот вечерва се бележи во повеќе македонски градови, во кои индексот на загадување AQI се движи од 140 до 160 (означено како „нездраво“) и достигнува до 184, што се смета за „опасно“.

Според податоците од мерните станици низ земјава, кои ги собира веб-страницата aqicn.org, воздухот е најзагаден во Кавадарци, како и во Битола, Струмица, Велес, Кичево, Тетово и Охрид. Нешто помало загадување има во делови од Скопје (Тафталиџе) и во Гостивар.

Според деталните податоци од мерните места, растот на индексот на загадување во повеќето градови се должи најмногу на големото покачување во концентрацијата на честичките ПМ-2,5 од околу 17 часот наваму.

Крајот на октомври и почетокот на ноември, односно доаѓањето на студеното време и грејната сезона, со години го означува и почетокот на зимските проблеми со аерозагадувањето во македонските градови.