Новиот анимиран хит „Супер Марио Галакси Филм“ (Super Mario Galaxy Movie) оствари извонреден успех на киноблагајните. Филмот во петокот заработи 48,3 милиони долари во 4.252 кина низ Северна Америка, а се проценува дека до недела на американскиот пазар ќе инкасира вкупно 129,4 милиони долари, пренесува „Форбс“.

Во комбинација со меѓународната заработка, оваа бројка ќе го надмине досегашниот рекорд на филмот „Проектот Очајнички обид“ како најголемо деби во 2026 година.

Во текот на првите пет дена од прикажувањето, се очекува „Супер Марио Галакси Филм“ во САД да заработи помеѓу 190 и 200 милиони долари. Иако ова е за нијанса помалку од оригиналот од 2023 година (кој заработи 204 милиони во истиот период), филмот сепак ветува дека ќе биде еден од најпрофитабилните проекти годинава.

Вселенска авантура со ѕвездена екипа

Дејството на „Супер Марио Галакси“ ги следи Марио (Крис Прат), принцезата Пич (Анја Тејлор-Џој), Луиџи (Чарли Деј) и Јоши (Доналд Гловер) кои заминуваат во вселената за да се соочат со Баузер Јуниор (Бени Сафди). Меѓу новите гласови во филмот се и Глен Пауел како Фокс Меклауд, Бри Ларсон како Розалина и Иса Реи како Honey Queen.

Состојба на киноблагајните

На второто место по заработка викендов се најде научно-фантастичниот филм „Проектот Очајнички обид“ (Project Hail Mary) на студиото „Амазон МГМ“, кој веќе достигна вкупна заработка од 219 милиони долари во Северна Америка.

Третото место го зазеде новото остварување на студиото A24, „Драма“, во режија на Кристофер Боргли. Филмот во петокот заработи 6,4 милиони долари, а главните улоги ги толкуваат Зендаја и Роберт Патинсон. Приказната следи пар пред венчавка чија врска почнува да се распаѓа по едно шокантно откритие.

На четвртото и петтото место се најдоа анимираниот филм на „Дизни“, „Хоперс“, со вкупна домашна заработка од околу 149 милиони долари, и религиозната историска драма „Големо будење“, која го следи пријателството помеѓу Бенџамин Френклин и свештеникот Џорџ Вајтфилд