Компанијата „Нестле“ потврди дека вовеле онлајн алатка за проверка на сериските броеви на чоколадите КитКат, откако беа украдени повеќе од 12 тони од овој производ наменет за европскиот пазар, пренесува „Уса тудеј“.

Кражбата се случила кон крајот на март, кога камион што превезувал околу 414.000 чоколади бил ограбен по напуштањето на производствен погон во централна Италија. Пратката била наменета за дистрибуција низ Европа, со крајна дестинација Полска.

Со цел да се утврди дали одреден производ припаѓа на украдената пратка, потрошувачите можат да ја користат специјалната алатка на интернет. Потребно е да се внесе осумцифрениот код од серијата, кој се наоѓа на задната страна од пакувањето.

По внесувањето, системот веднаш покажува дали чоколадото е дел од украдената количина. Доколку не е, корисниците се повикуваат да ја споделат алатката и да помогнат во проширување на потрагата.

Help us find them. Use the Stolen KitKat Tracker. Link in bio. pic.twitter.com/VLknwiHbGf

— KITKAT (@KITKAT) April 1, 2026

Компанијата соопшти дека оваа иницијатива не е шега, иако беше објавена на 1 април.

„Некој навистина украде 12 тони КитКат чоколади и навистина сакаме да дознаеме каде се“, наведоа од компанијата.

Доколку се внесе код од украдената серија, системот дава јасни инструкции како да се извести компанијата, која потоа ќе ги преземе потребните чекори и ќе ги сподели информациите со надлежните институции. Од Нестле дополнително објаснија дека украдените производи не се стандардните чоколади, туку нова серија во форма на болид од Формула 1.

Камионот и неговата содржина сè уште не се пронајдени, а истрагата продолжува во соработка со локалните власти и партнерите во синџирот на снабдување.

Крадци украле камион со дванаесет тони „КитКат“ наменети за повеќе пазари низ Европа