Дизајнерот на машката линија на Луј Витон, Фарел Вилијамс, ја претстави новата колекција на брендот, која носи дискретна елеганција во смирени тонови, а со оваа ревија воедно беше отворена и Модната недела во Париз.

Ревијата на есенско-зимската колекција се одржа во огромна стаклена коцка поставена пред Фондацијата „Луј Витон“, која зад својата фасада чува уметнички дела дизајнирани од покојниот американски архитект Френк Гери.

Гостите се собираа во момент кога веста за смртта на Валентино се прошири низ модниот свет, што ѝ даде посебна, тажна нота на самата атмосфера на отворањето.

„Светот изгуби мајстор“, изјави за „Ројтерс“ руската претприемачка Алиса Волскаја, опишувајќи го заминувањето на Валентино како многу тажно, но додавајќи дека тој му подарил огромна убавина на светот.

Во внатрешноста, моделите облечени во класични креации во беж, сиви и кафени нијанси прошетаа по вештачки тревник околу конструкција што наликуваше на куќа од стакло.

Тие носеа вратоврски, долги палта, сакоа со двојно закопчување и темнокафени кожни капи, надополнети со темноцрвени и светложолти акценти.

Музичката подлога ја создаваа гудачки оркестар и танчари во госпел-стил, кои со аплауз и движења се вклопуваа во хип-хоп ритам.

Вилијамс, музички продуцент и добитник на Греми, кој во 2023 година стана креативен директор на машката мода во Луј Витон, на крајот излезе на пистата за да ја поздрави публиката, меѓу која беа пејачот Џон Леџенд, раперите Фјучер и Скепта, како и првата дама на Франција, Брижит Макрон.