Коментаторот на пријателскиот фудбалски натпревар меѓу Република Ирска и Македонија во Даблин, кој го пренесуваше Македонската радиотелевизија, вечерва направи голем гаф, кога го спомена Среќко Катанец и на него реферираше како „покојниот Среќко Катанец“, иако тој е жив.

Ова се случи пред крајот на првото полувреме од натпреварот, кој заврши без голови.

62-годишниот Сречко Катанец, поранешен репрезентативец на СФР Југославија и на Словенија, ја предводеше Македонија од клупата од 2006 до 2009 година. Лани во јануари, тој се повлече од позицијата селектор на Узбекистан, наведувајќи дека дава оставка поради здравствени причини. Кон средината на минатата година, некои медиуми објавија дека тој е тешко болен, а оттогаш немаше подетални информации за неговата здравствена состојба.

Во спортското коментирање, разбирливо, се случуваат гафови, но таков како вечерашниот не можат да се слушнат често.

Македонија одигра реми без голови против Р. Ирска на стадионот „Авива“ во Даблин