По најавата за четвртиот дел од хит филмската франшиза „Бриџит Џонс“, беше објавен и долгоочекуваниот трејлер за филмот. Но, многу фанови беа растажени, откако беше откриено дека еден од омилените ликови починал. Во претходното продолжение, Бриџит, која ја игра Рене Зелвегер, се омажи за Марк Дарси (Колин Фирт), пишува „Дејли Мејл“.

Бриџит и Марк имаа врска во која раскинуваа и се смируваа во сите три продолженија, а потоа конечно го добија својот среќен крај откако се дозна дека тој е татко на нејзиното дете. Меѓутоа, во четвртата книга напишана од Хелен Филдинг, и врз основа на која е снимен филмот, Марк умира. Затоа, филмот ќе го отслика животот на Бриџит по неговата смрт и нејзиното искуство како самохрана мајка.

Иако некои обожаватели на филмот беа свесни за тоа што следува, оние кои не ја прочитале книгата останале шокирани и тажни по објавувањето на трејлерот. Реакциите на фановите ја преплавија социјалната мрежа Икс.

„Не бев подготвен да плачам за смртта на господин Дарси во новиот филм за Бриџит Џонс. Марк Дарси е мртов?!“, „Сакаш да ми кажеш дека четвртото продолжение на Бриџит Џонс ќе излезе наскоро и тие го убиле Г-дин Дарси?“, „Бриџит Џонс без Марк Дарси, има ли тоа логика?“, „Конечно ѝ дадоа среќен крај, а потоа го убија г-дин Дарси ?“, „Ми се скрши срцето кога видов дека г-дин Дарси умре во трејлерот за Бриџит Џонс. Зошто не можеа да живеат среќно засекогаш?“ напишаа обожавателите на франшизата.

Трејлерот за четвртиот дел од филмот ја прикажува Бриџит која е охрабрена од нејзините пријатели да застане на нозе по смртта на Марк. Филмот ќе ја прикаже и нејзината романтична врска со Роксстер, кој го игра Лео Вудал, и г-дин Валакер, кој го игра Чиветел Еџиофор.

Новото продолжение на филмот беше официјално потврдено оваа година, а режисер е Мајкл Морис. Сценариото го напишаа Хелен, Аби Морган и Ден Мазер. Покрај Рене, на нивните улоги ќе се вратат Хју Грант, Џим Бродбент и Џема Џонс, а ќе се појави и Колин.