Универзитетската клиничка болница Мостар ги отфрли апаратите за дишење кои ги добија како донација од Федералната управа за цивилна заштита откако беа увезени од Кина од компанијата „Сребрена малина“.

– Ние ја одбивме понудата затоа што, според проценката на нашите анестезиолози, ваквите апарати не можат да бидат од корист за нашите пациенти. Во принцип, постои оправдано сомнение дека можат да го загрозат нивното здравје – изјави портпаролот на Универзитетската клиничка болница Мостар, Адријана Панджа, пренесе Срна.

Таа изјави дека сите анестезиолози во таа здравствена установа потпишале изјава дека не сакаат да ракуваат со вакви уреди затоа што не се за соодветна клиничка употреба.

Шефот на Одделот за анестезија, реанимација и интензивно лекување на Универзитетската клиничка болница Мостар, Зоран Карловиќ, изјави дека болницата не ја одбива донацијата, но „не сака да зема респиратори што се неупотребливи, па дури и смртоносни за време на употребата“.

– Тоа се уреди од втора класа кои се наменети за катастрофи или не знам ни за што. Тие испорачуваат 300 милилитри во еден момент, а 900 милилитри во друг, што значи дека уредот буквално може да убие човек – објасни Карловиќ. Тој потсети дека при набавката на спорните респиратори не е побарана професијата, а цената на набавените уреди не одговара на нивната вредност и надминува 200 пати.

– Вредноста на тој уред на пазарот чини околу две до три илјади долари, а во криза може да достигне пет илјади долари и ништо повеќе, бидејќи тоа е апарат од втора класа што е направен некаде во гаражата, не можам ни да го објаснам тоа – истакна Карловиќ.

Во април, компанијата „Сребрена малина“ увезе 100 респиратори од Кина за потребите на Федерацијата БиХ, за кои плати 10,5 милиони КМ, за кои потоа се утврди дека имаат дефект на системот. Набавката на овие респиратори е предмет на истрага од Обвинителството на БиХ.

Обвинителството на БиХ предложи едномесечен притвор за Фадил Новалиќ, премиерот на ФБиХ, Фахрудин Солак, директорот на Федералната управа за цивилна заштита и Фикрет Хоџиќ, сопственикот на „Сребрена малина“.