Дишеме празни ветувања или чист воздух, прашуваат од организацијата „Еко-свест“ и искажуваат сомнежи околу идното работење на Цементарницата „Усје“, која е во фаза на обнова на нивната еколошка дозвола.

„Неодамнешната јавна расправа за обнова на еколошката дозвола покажа дека наместо усогласување со ЕУ стандардите, се планира нова дозвола со старите граници на загадување“, забележува „Еко-свест“.

Како што велат оттаму, во однос на прашината, Цементарницата бара дозвола за 30 до 60 mg/Nm3 (милиграми загадувачка материја по нормален кубен метар гас), што според организацијата е дури три пати повеќе од ЕУ стандардот.

„Ако Усје има филтри за 10 mg/Nm3 зошто тогаш бараат можност да загадуваат повеќе?“, прашуваат од организацијата.

Во однос на азотните оксиди (Nox), „Еко-свест“ посочува дека „Усје“ бара граници кои се четири пати повисоки од европските.

„Иако согоруваат фосилни и други горива (петрол кокс и алтернативно гориво), во дозволата нема дефинирано гранични вредности за тешки метали! Кога нема граница, нема ни обврска да ја исполнат. Дали треба така да биде?“, нагласуваат од „Еко-свест“, наведувајќи заклучок дека се врши и селективен мотиноринг, односно, како што велат, континуираните мерења воопшто не ги опфаќаат клучните емисии како јаглерод моноксид, хлороводород, жива итн.

Организацијата има и свои барања, за кои вели се јасни и без компромис.

„Најстроги можни гранички вредности за ограничување на загадувањето! Автоматски системи на заштита во постројката! Континуиран и редовен мониторинг на сите видови емисии!“, бараат од организацијата.

Според „Еко-свест“, сведоци сме на загадувањето околу нас и обновата на оваа дозвола е можност индустријата да се стави во построги рамки кои гарантираат заштита на здравјето на граѓаните.

„Сите имаме загарантирано право на живот во здрава и чиста животна средина“, констатираат од „Еко-свест“.

Критики од повеќе еколошки организации

Повеќе критики кон целиот процес за новата дозвола на „Усје“, како и за нејзината содржина, упатија разни еколошки организации, меѓу кои и „Стоп за Усје“. Оттаму побараа „НЕ за дозвола по стари правила“, обвинувајќи дека предложената дозвола отстапува од европските стандарди, по повеќе основи.

Од „ТИТАН УСЈЕ“ пак, рекоа дека навремено и транспарентно ги спровеле сите постапки за продолжување на А-интегрираната еколошка дозвола, а во изминатите години инвестирале во современи технологии и опрема за заштита на животната средина.

Цементарницата бара да продолжи да ги труе скопјани со застарени стандарди, обвини „Стоп за Усје“ пред денешниот протест