Вардар елиминиран – Струга Трим Лум, Силекс и Македонија ЃП во полуфиналето на Купот
Денеска дознавме три од четирите екипи кои обезбедија место во полуфиналето на фудбалскиот Куп на Македонија за натпреварувачката сезона 2022/2023.
Последниот учесник треба да биде по епилогот меѓу Шкупи и Шкендија чиј натпревар поради нереди на стадионот „Чаир“ беше прекинат во деветтата минута при резултат 0:1 за гостите.
Фудбалската федерација на Македонија (ФФМ) информира дека во тек е состанокот на Комисијата за натпреварување, и по завршувањето на истиот ќе се објави одлуката во врска со случувањата од натпреварот Шкупи – Шкендија.
Ланскиот шампион во Купот, екипата на Македонија Ѓорче Петров триумфираше со 1:0 над Академија Пандев со голот на интернационалецот од Брегот на Слоновата коска, Адама Самаке во 77 минута од средбата.
Потоа, водечкиот во шампионатот Струга Трим Лум со 2:0 ја елиминираше Брегалница Штип. Стружани по само две минути игра стекна предност со погодокот на Едис Малиќи, а конечниот епилог го постави Буњамин Шабани во 59 минута.
На дуелот во Кратово победникот меѓу Силекс и Вардар се решаваше по изведувањето на пеналите. По регуларните 90 минути мрежите мируваа, а по ударите од белата точка Силекс беше подобар со 3:2.