Четвртфиналниот натпревар од Купот на Македонија помеѓу Шкупи и Шкендија беше прекинат по само девет минути игра при актуелен резултат 0:1 за тетовските „црвено-црни“.

Официјалниот прекин на стадионот „Чаир“ во Скопје се случи по нападот врз фудбалерите на Шкендија по голот на Дашмир Елези.

Влегувањето на некои домашни навивачи во теренот и фрлањето огномети и тврди предмети кон фудбалерите на Шкендија предизвикаа безбедносните сили првично да наредат повлекување на екипата на Шкендија во соблекувалната од безбедносни причини.

По средбата на делегатот, судиите на средбата, комесарите за безбедност на двата клуба и на ФФМ, претставниците на МВР Скопје одговорни за безбедноста на овој натпревар и одговорните од Натпреварувачката комисија при ФФМ, беше одлучено дека нема безбедносни услови за продолжување на натпреварот.

Ќе следат дополнителни извештаи за случувањата на овој натпревар од страна на делегатот, претставникот на обезбедувањето на ФФМ и судиите за конечна одлука за епилогот на овој дуел од Купот на Македонија.