Унгарското обвинителство го повлече случајот против градоначалникот на Будимпешта за ланската Парада на гордоста
Обвинителите од Унгарија ги повлекоа обвиненијата против либералниот градоначалник на Будимпешта, Гергељ Карачони, кој имаше своја улога во организирањето на ЛГБТК+ маршот за права во 2025 година, пренесува Ројтерс.
Препорачано
Десетици илјади демонстранти маршираа низ Будимпешта во јуни 2025 година и покрај полициската забрана, претворајќи ја Парадата на гордоста во масовен антивладин протест и една од најголемите опозициски манифестации против поранешниот премиер Виктор Орбан.
Орбан беше сменет на изборите на 12 април по 16 години власт, од централно-десничарската партија Тиса на Петар Маѓар.
ВИДЕО | И покрај забраната, десетици илјади Унгарци дојдоа на Парадата на гордоста во Будимпешта
Обвининието за градоначалникот Карачони стигна пред изборите во јануари, со кое се тврдеше дека го прекршил законот, со тоа што организирал и водел забранет собир.
Карачони се обидел да ја заобиколи полициската забрана така што го регистрирал маршот како општински настан, за кој тврдел дека не бара дозвола. Маршот во центарот на Будимпешта на крајот се одржа мирно и учествуваа повеќе од 100.000 луѓе, меѓу кои и неколку европски политичари и критичари на владата на Орбан.
Обвинителите соопштија дека ги повлекле обвиненијата, повикувајќи се на одлука на Судот на правдата на Европската унија од крајот на април, според која унгарскиот закон за „заштита на деца“ од 2021 година го крши правото на ЕУ. Овој закон бил основа за забраната на настанот.
Промени во унгарската политика кон ЛГБТК+ заедницата
Според анкета спроведена во деновите по изборите во Унгарија, повеќе од 70 отсто од испитаниците сакаа новиот премиер Петар Маѓар да ги заштити правата на ЛГБТК+ заедницата – област која претрпе драматични ограничувања за време на владеењето на Орбан.
Унгарската полиција соопшти дека нема да спречи никого да учествува на парадата „Будимпешта прајд“ што ќе се случува следниот месец, што сигнализира промена во политиката кон ЛГБТК+ заедницата.
Освен што метрополитенската полиција на Будимпешта ја одобри парадата „Будимпешта прајд“ за 2026 година, исто така издаде и рестриктивни наредби во врска со три контрадемонстрации.
