Унгарската полиција соопшти дека нема да спречи никого да учествува на парадата „Будимпешта прајд“ следниот месец, што сигнализира промена во политиката кон ЛГБТК+ заедницата во земјата откако премиерот Петер Маѓар ја презеде функцијата претходно овој месец, објави „Политико“.

— Метрополитенската полиција на Будимпешта ја одобри парадата „Будимпешта прајд“ за 2026 година и, исто така, издаде рестриктивни наредби во врска со три контрадемонстрации — изјави денеска портпарол на полицијата за „Политико“.

Соопштението ја потврдува заложбата на Маѓар да води полиберален пристап кон ЛГБТК+ правата во Унгарија.

Претходникот на Маѓар, десничарскиот премиер Виктор Орбан, беше познат по политиката на неговата влада насочена против ЛГБТК+ правата. На почетокот на 2025 година, унгарскиот парламент усвои законодавство што на крајот доведе до забрана на парадата „Будимпешта прајд“.

Градоначалникот на Будимпешта, Гергељ Карачоњ, политички ривал на Орбан и политичар од Зелените, сепак пронајде правна празнина и ја одржа поворката минатата година и покрај забраната. На неа присуствуваа повеќе од 100.000 луѓе, меѓу кои и неколку европски политичари и критичари на владата на Орбан.

Меѓународна поддршка за ЛГБТИ заедницата во Унгарија за одржување на Парадата на гордоста

Карачоњ потоа беше обвинет за непочитување на владината забрана, но судот ја суспендираше постапката во март. Минатиот месец, највисокиот суд на ЕУ ја поништи анти-ЛГБТК одлуката на владата на Орбан.

Карачоњ го поздрави укинувањето на забраната за прајд-парадата оваа година.

— Ова е правилна одлука. Таа покажува дека, и покрај задушувачката политичка клима во изминатата деценија и половина, културата на слободата во Унгарија преживеа. Покажува дека сè уште има луѓе со храброст цврсто да застанат. Покажува дека она што е очигледно вистинито не може да се прикрие со нечесна реторика — изјави тој денеска за „Политико“.

Копретседателката на Европската зелена партија, Вула Цецу, за „Политико“ изјави:

— Многу сме среќни поради ова. Тоа е надежен сигнал за демократијата и основните права во Унгарија по години напади врз ЛГБТКИ+ заедницата.

Собирот треба да се одржи на 27 јуни.