Трет Македонец во Пјуник, и Кире Ристевски потпиша за ерменскиот шампион
Кире Ристевски во новата сезона ќе настапува за ерменскиот клуб Пјуник, нашиот 31-годишен одбранбен играч е третиот Македонец кој ќе настапува за шампионот на Ерменија во чиј состав се и Марјан Радески и Стефан Спировски.
Ристевски не се најде на списокот играчи кај селекторот Благоја Милевски за натпреварите овој месец во Лигата на нации против Грузија и Ерменија. Ристевски ја прекина соработката со неговиот последен клуб АЕЛ Лимасол од Кипар на 30 август.
Во кариерата беше дел и од Пелистер, Елбасани, Билис Балш, Славија Софија, Тирана, Работнички, Вашаш и Ујпешт. Во сезоната 2020/2021 со екипата на Ујпешт успеа да дојде до трофејот во Купот на Унгарија.
Ристевски беше дел од младинските селекции на Македонија, а од 2014 година е во сениорскиот дрес со 57 настапи.
Потсетување дека сезонава Пјуник настапува во групната фаза на Лигата на конференции. Своето учество во тоа натпреварување Ерменците го започна со пораз од швајцарскиот Базел (1:3), а во групата „Х“ се и Слован Братислава од Словачка и литванскиот Жалгирис.
Пјуник не објави детали од договорот со Ристевски, но му посакаа успешни настапи, а воедно на својот официјален клупски сајт го објавија и податокот дека според „Трансфермаркт“ вредноста на Македонецот се проценува 350.000 евра.