Американскиот претседател Доналд Трамп изјави дека имал долг разговор со привремената претседателка на Венецуела, Делси Родригез, која ја нарече „одлична личност“, пренесува „Политико“.

„Денес имавме одличен разговор и таа е одлична личност. Мислам, таа е личност со која ќе соработуваме многу добро“, им рече Трамп на новинарите. „Разговарав со неа утрово, имавме долг телефонски разговор, разговаравме за многу работи и мислам дека се справуваме многу добро со Венецуела“, додаде тој.

Пред да ја преземе функцијата привремен претседател на Венецуела, Делси Родригез беше потпретседател на Николас Мадуро, кој беше заробен на 3 јануари за време на американската воена операција во Каракас и однесен во САД за да му се суди за „трговија со дрога“.

Трамп, кој по рацијата изјави дека САД ќе ја водат Венецуела, рече дека тој и Родригез разговарале за нафта, минерали, трговија и национална безбедност.

Родригез, во својата објава на социјалните мрежи, ја опиша нивната размена како „долг и учтив разговор“.

Трамп ја пофали и неа пред новинарите откако беше прашан за коментарите од шефот за безбедност на Венецуела, Диосдадо Кабело, кој сугерираше дека јужноамериканската земја не би сакала да соработува со САД.

Нивниот повик дојде еден ден пред Трамп да се сретне со лидерката на венецуелската опозиција, Марија Корина Мачадо, во Белата куќа. Мачадо ја освои Нобеловата награда за мир за 2025 година за нејзината работа во промовирањето на демократијата и човековите права во Венецуела – награда за која Трамп отворено се залагаше во текот на првата година од враќањето на функцијата.

Не е јасно дали средбата на Трамп со Мачадо ќе влијае на односите на САД со Родригез, кого американските претставници го идентификуваа како некој што ќе ги заштити идните американски енергетски инвестиции во Венецуела, објави „Њујорк тајмс“. Трамп кратко по воената операција што резултираше со апсење на Мадуро изјави дека Мачадо нема „почит“ од венецуелскиот народ.

Венецуела вели дека е подготвена за „нова агенда“ со ЕУ