Тиквеш тагува, Силекс останува прволигаш
Денеска на стадионот во Ѓорче Петров со конечен резултат 3:2 Силекс беше подобар во пресметката против Тиквеш. Тимот од Кратово поведе уште во 12 минута со еден убав погодок на Бобан Георгиев, а истиот играч ја зголеми предноста 180 секунди подоцна.
Фудбалерите на Тиквеш ја вратија неизвесноста преку Ивановски за намалување на негативата, но повторно беа во „минус два“ откако стрелаше Рајковиќ на спротивната страна за 3:1.
Во второто полувреме во однос на првото имаше само еден погодок, играчите од Кавадарци кои имаа голема поддршка на трибините се обидоа со сите сили да се вратат целосно, но на крајот само го ублажија поразот. Ивановски по втор пат се запиша во листата на стрелците во 58. минута.
Така, комплетиран е списокот на учесници во Првата лига за наредната сезона 2019/2020: Академија Пандев, Борец, Македонија ЃП, Работнички, Ренова, Шкендија, Шкупи, Струга Трим Љум, Вардар и Силекс.
Најдобри во второлигашките натпреварувања на Истокот и Западот беа екипите на Борец и Струга Трим Љум.