Судењето на Расел Бренд за силување и сексуален напад е одложено до октомври, објавија светските медиуми.

Првично закажано за јуни, судењето во Велика Британија против актерот и комичар сега ќе се одржи подоцна во годината, потврди лондонски судија.

Во април 2025 година, Расел Бренд (50) беше обвинет од страна на Крунската обвинителска служба за едно обвинение за силување, непристоен напад и орално силување, како и две обвиненија за сексуален напад, врз основа на обвинувањата на четири анонимни жени. Наводните инциденти се случиле помеѓу 1999 и 2005 година, а Бренд се изјасни за невин по сите обвиненија во мај 2025 година.

Во декември 2025 година, обвинителството поднесе уште две обвиненија за силување и сексуален напад, поврзани со обвинувањата на уште две жени. Бренд, исто така, се изјасни за невин по овие нови обвиненија. Тој првпат беше обвинет за сексуален напад во септември 2023 година, кога пет жени зборуваа за своите наводни искуства во заедничка истрага на „Сандеј тајмс“, „Тајмс“ и „Диспчес“ на „Канал 4“.

Овие обвинувања ја поттикнаа Метрополитенската полиција да го испита Бренд, што кулминираше со обвинение. По обвинувањата, Бренд јавно ја потврди својата невиност и ја нагласи својата мината борба со зависноста.

– Бев будала пред да почнам да живеам во светлината Господова. Бев зависник од дрога, зависник од секс и имбецил. Но, она што никогаш не бев беше силувач – рекол Бренд во видео објавено на мрежата Икс минатиот мај.

Пред да стекне слава како ТВ водител во 2000-тите, Бренд, роден во Британија, ја изгради својата кариера како стендап комичар. Подоцна се појави во филмови како „Заборавајќи ја Сара Маршал“ и „Однеси го до Гркот “, а водеше и своја радио емисија на Би-би-си.

Расел Бренд се изјасни за невин по обвиненијата за силување и сексуално вознемирување