Студентските домови во Охрид пренаменети за примање случаи со корона вирус
Станува збор за вкупно 68 соби во двата објекти, каде веќе се спроведуваат активности за дезинфекција и подготовка за прием на заболени.
Градоначалникот на Охрид Константин Георгиески денеска брифираше за активностите што ги спроведува локалната власт за исполнување на препораките по однос на ситуацијата со корона вирусот.
– Општина Охрид ги подготвува двата објекти на студентскиот дом „Никола Карев” и ученичкиот дом „Ванчо Питошески” во градот за сместување и изолација на пациенти инфицирани со корона-вирус, а се со полесна клинична слика. Станува збор за вкупно 68 соби во двата објекти, каде веќе се спроведуваат активности за дезинфекција и подготовка за прием на заболени, истакнува Георгиески.
Поради мерките за спречување на ширењето на вирусот општинските служби од денеска работат со редуциран број вработени.
Изминатиот период општината спровела целосна вонредна дезинфекција на градинките, училиштата во градот, а наскоро како што се најавува ќе биде спроведена дезинфекција на сите образовни установи во градот.