Со 51 глас „за“ и 40 „против“: Американскиот Сенат ја потврди Деб Халанд за секретарка за внатрешни работи
Американскиот Сенат го потврди изборот на Деб Халанд за секретарка за внатрешни работи во администрацијата на претседателот Џо Бајден, јави „Си-Ен-Ен“. Таа е избрана со 51 глас „за” и 40 „против”. Поголемиот број републиканци гласаа против именувањето на Халанд, истакнувајќи оти нејзините ставови за користењето на јавното земјиште и употребата на фосилни горива се екстремни.
Тоа е историски чекор, бидејќи првпат министерка станува претставник на американските староседелци – Индијанците.
Сепак, не е првпат Деб Халанд да пишува историја, нагласува „Си-Ен-Ен“. Таа во 2018 година, освои место во Конгресот и беше една од двете претставнички на индијанските заедници, кои беа и првите жени со индијанско потекло избрани во Претставничкиот дом.
Халанд се очекува да има активна улога во планот на Бајден за справување со климатската криза и намалување на емисиите на штетни гасови.
Деб Халанд (60) потекнува од Индијанците од Пуебло, група луѓе кои живеат во југозападниот дел на САД.