Повеќе случаи на брутално семејно насилство се забележани во изминатиот ден, соопшти МВР. Во Скопје, на службен разговор е повикан 27-годишен жител на градот, кој бил пријавен дека подолго време психички го малтретирал сопствениот татко и им се заканувал на членови на семејството.

„На 22.07.2026 во 14:25 часот во Полициската станица Кисела Вода, полициски службеници од СВР Скопје извршија службен разговор со Н.К.(27) од Скопје, постапувајќи по претходна пријава дека подолг период психички го малтретирал неговиот 54-годишен татко и притоа му упатувал закани нему и на неговото семејство. По целосно документирање на случајот ќе следува соодветна пријава“, велат од МВР.

Во друг случај, во Велес, уапсен е 42-годишен насилник, кој ја нападнал мајка си со стаклен предмет.

„На 22.07.2026 во 22:30 часот, полициски службеници од СВР Велес го лишиле од слобода Д.Ш.(42) од Велес, постапувајќи по претходна пријава од неговата 68-годишна мајка дека во семејниот дом агресивно се однесувал и ја удрил со стаклен предмет. Д.Ш. бил приведен во полициска станица, известен бил јавен обвинител и по документирање на настанот против него ќе биде поднесена соодветна пријава“, пишува во полицискиот билтен.