Основното јавно обвинителство Гевгелија поднесе обвинителен предлог и побара мерка притвор за маж осомничен за кривичните дела „Телесна повреда“ и „Загрозување на сигурноста“, сторени во услови на семејно насилство.

Според Јавното обвинителство, ноќта меѓу 18 и 19 јули, по вербална расправија во семејниот дом околу тестаментот што го потпишала мајката на оштетената, обвинетиот најпрво ја навредувал својата сопруга, а потоа ја истепал.

„Тој почнал да ја навредува оштетената, а потоа и физички ја нападнал, удирајќи ја со боксови и клоци во главата и телото и нанесувајќи ѝ телесни повреди – повеќе крвни подливи“, соопштуваат од Обвинителство.

Следната вечер, откако жената го пријавила случајот во полиција и заминала во домот на својата ќерка, обвинетиот испратил заканувачка СМС-порака на телефонот на ќерката.

Во пораката навел дека, доколку сопругата не се врати дома, купил 10 литри бензин и ќе ја запали куќата. Со заканите, според Обвинителството, кај оштетените предизвикал чувство на страв, несигурност и загрозеност.

„Имајќи ги предвид сите околности, а особено фактот дека обвинетиот ги сторил кривичните дела во услови кога е осуден за претходно сторено кривично дело загрозување на сигурноста и му е изречена мерка – условна осуда три месеци, а за која рокот на проверка од една година сè уште трае, јавниот обвинител оцени дека е неопходно да предложи да му биде определена мерка притвор додека трае новата постапка против него“, соопшти Обвинителството.

Насилник со нож им се заканувал на газдите во Трубарево — неговата сопруга побегнала во казино да го пријави во полиција