Родителите реагираат: Не е фер да се оценуваат учениците во кризата, кога условите не се исти за сите деца

Profimedia

Според министерот за образование Адеми, наставниците реба да бидат многу креативни за да создадат онлајн-тестови и да им оневозможат на учениците да не ги препишат одговорите.

Бројни родители и ученици се растревожени од најавите на Министерството за образование и наука дека ќе се оценува успехот на децата во периодот додека трае далечинското учење, а овие оценки ќе се сметаат и при заклучувањето на завршните оценки за оваа учебна година. Тие велат дека децата дома не можат да постигнат да сработат се што испраќаат наставниците, а секојдневно добиваат задачи и материјали и не е коректно успехот од овој период кога масовно се импровизира во образовниот процес да е вреднува во крајните оценки.

Од друга страна министерот за образование Арбер Адеми во телевизиско гостување најави дека онлајн-наставата е задолжителна и дека со владина уредба веќе станала формална настава, а не понуди решение како граѓаните да ја исполнат задолжителноста ако немаат основни услови како компјутер или интернет. Бирото за развој на образованието веќе го изготви упатството за тестирање и оценување, а Адеми најави дека наставниците треба да бидат многу креативни за да создадат тестови и да им оневозможат на учениците да не ги препишат одговорите.

Родителите реагираат дека материјалот што им се испраќа на децата е ист по обем и содржина како оној што би го учеле со наставник во училница и апелираат да се работи по скратена програма.
– Наставниците во училиштето на моето дете како да се натпреваруваат кој повеќе материјал ќе испрати, а во училиштето на внук ми, кој е во друга општина е друга приказна. Таму наставничката ги советува родителите да не брзаат, да работат смирено и колку што можат. Ако не можат да ги фотографираат сите домашни задачи и да ги испраќаат по мејл, им кажала да ги чуваат во папка. Кај моето дете наставниците како да заборавиле дека децата по распоред не го имаат секој предмет секој ден, а секој ден им бараат по нешто! Излегува дека секој ден имаат по десет домашни задачи. Со кое право толку ги оптоваруваат децата во овие стресни услови со пандемија, кога сите сме исплашени и загрижени за своето здравје, иднина и опстанок? – вели еден родител.
Родителите реагираат и дека немаат доволно ресурси ниту време за да одговорат на барањата на училиштата.

– Јас работам од дома и компјутерот го држам зафатен околу 4 до 5 часа дневно, а потоа работат децата кои се ученици во четврто и шесто одделение. Добиваме наставни листови и домашни задачи по предметите еднаш неделно, но среќа е што наставниците не испраќаат толку обемен материјал за учење. Децата ги принтаат задачите, ги решаваат, па ги фотографираат и ги испраќаат на мејл, а потоа  ги бришат фотографиите оти и меморијата во телефоните е ограничена. Сето тоа одзема многу внимание и ни предозвикува голем стрес затоа што по цел ден сме работно ангажирани наместо да се опуштаме. Немаме време за сето тоа и не е фер што е донесена одлука да им се ставаат оценки на децата за овој период – вели една мајка.

Психолозите предупредуваат дека напнатата состојба, загриженоста, стравот и прекумерните обврски можат емоционално да го преплават целото семејство. Многумина советуваат родителите да не ја напуштат својата примарна родителска улога додека ја играат улогата на наставниците во домот.

Според психотерапевтот Ана Блажевска со децата може и треба да се разговара отворено и на јазик што тие го разбираат.

– Предизвик за децата и родителите во оваа ситуација е да се адаптираат на затворањето на градинките и училиштата. Бидејќи родителите сега треба да имаат и едукативна улога, а тоа е дополнителен товар. Родителите е важно и самите да бидат поддржани и да можат да останат во добар контакт со своите деца. Добриот контакт и играта може многу да придонесат кон подобро справување во ситуацијата. Овие нешта е едноставно да се кажат, но многу потешко да се направат, особено доколку контактот не бил адекватен и претходно – вели меѓудругото Блажевска во интервју за „Слободен печат’“.

Според упатството за оценување, наставниците можат да користат повеќе методи и техники  за формативното оценување на учениците. Можат да им задаваат задачи со работа во група да изработуваат на проекти, постери и истражувачки задачи, да водат дискусии преку скајп или вибер, да им задаваат есејски прашања по мејл, како и да одржуваат мултимедијални презентации, тестови на знаења и контролни вежби. За теститање самите наставници треба да создадат тестови со прашања и задачи, прашања со повеќе избори, отворени прашања или прашања со надополнувања и кратки одговори. Задачите и прашањата треба да се изготват согласно наставните програми, а тестовите не треба да се обемни и се препорачува да содржат најмногу десетина суштински задачи прашања.

Министерот Адеми рече дека во сите училишта се одвива он-лајн наставата и дека на целата територија на државата има покриеност со интернет. Според него проблем со пристапноста до интернет имаат семејства без приходи поради што МОН со допис побарало  училиштата да информираат колку деца немаат пристап до интернет поради матријални услови. Како што рече министерот, имало недоразбирање зашто училиштата мислеле дека ќе им се доделуваат ИТ-уреди и известиле само за деца што не поседуваат уреди.

– За интернетот е малку полесно зашто со министерот за информатичко општество Дамјан Манчевски размислуваме да доделуваме ваучери за интернет за да се обезбеди бесплатен интернет за децата од социјален ризик. Што се однесува до уредите, кога велиме учење од дома не мислиме на некои најмодерни ИТ-уреди, со посебни камери и микрофони итн. На пазарот може да се најде и  употребен уред по скромна цена. Доволно е да имаме паметен телефон и се да следиме онлајн – рече министерот Адеми во гостувањето на „Сител“.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот