Францускиот институт во Скопје организира предавање посветено на историјата на Ромите на Балканот, од нивното доаѓање во Средниот век до Првата светска војна, што ќе се одржи на 5 февруари, во 19 часот, во „Јуроп хаус“ во Скопје.

Предавач на настанот ќе биде Бернар Лори, историчар, професор и познавач на историјата на Балканот, додека модератор ќе биде м-р Даниел Петровски, Институт за фолклор „Марко Цепенков“.

Низ темелен историски пристап, заснован на примарни извори од земјите од Југоисточна Европа, вклучувајќи ја и Северна Македонија, Бернар Лори ќе ги посочи динамиките на прилагодување, интеракција и коегзистенција помеѓу ромското и локалното население, разбивајќи ги предрасудите поврзани со нивната маргиналност.

Бернар Лори е автор на делото „Ромите на Балканот, 1280–1914“, кое проследува неколку века социјална, економска и политичка историја на ромското население во регионот. Делото е достапно во медијатеката на Францускиот институт во Скопје.

Настанот е отворен за широка публика: истражувачи, студенти, наставници, културни работници, како и за сите заинтересирани за историјата на Балканот, културната разновидност и општествените динамики во Југоисточна Европа.