Повеќе од 80 актери, режисери и други уметници кои учествувале на Берлинскиот филмски фестивал, меѓу кои Тилда Свинтон и Хавиер Бардем, потпишаа отворено писмо објавено во вторникот, во кое ги повикуваат организаторите да заземат јасен став за израелскиот конфликт во Газa, пренесува „Ројтерс“.

„Ги повикуваме организаторите на Берлинале да ја исполнат својата морална должност и јасно да се изразат против израелскиот геноцид, злосторствата против човештвото и воените злосторства врз Палестинците“, се наведува во писмото, кое целосно го објави „Вараети“.

Повеќе експерти за човекови права, научници и истражувачи на ООН наведуваат дека израелскиот напад врз Газa претставува геноцид. Израел ги нарекува своите акции самоодбрана по нападот на Хамас врз Израел во октомври 2023 година.

„Згрозени сме од институционалното молчење на Берлинале“, стои во писмото кое го потпишаа и актерите Адам Мкеј, Алиа Шокат и Брајан Кокс, како и режисерот Мајк Ли.

Во писмото се наведува дека организаторите не ги исполниле барањата да објават изјава со која ќе го потврдат правото на Палестинците на живот и ќе се обврзат да го заштитат правото на уметниците јавно да зборуваат за ова прашање.

„Ова е најмалку што можат и треба да направат“, се вели во писмото. Фестивалот не одговори веднаш на барањето за коментар испратено по е-пошта.

Берлинскиот филмски фестивал се смета за најполитички меѓу своите другите филмски фестивали како Венецијанскиот фестивал и Канскиот фестивал – и се гордее со прикажување филмови од недоволно застапени заедници и промовирање на млади таленти.

Сепак, повеќепати бил критикуван од пропалестински активисти поради тоа што не зазема став за Газa, за разлика од војната во Украина и ситуацијата во Иран.

Во отвореното писмо беше осудена и изјавата на претседателот на жирито, Вим Вендерс, дека филмаџиите треба да се држат подалеку од политика.

„Не можете едното да го одвоите од другото“, напишал Вендерс.

Поради неговата изјава, писателката Арундати Рој се повлекла од фестивалот, нарекувајќи ги неговите изјави неприфатливи.

Директорката на фестивалот, Триција Татл, одговори дека на Берлинале постои слобода на говор и ја бранеше можноста на уметниците да не коментираат политички прашања, предупредувајќи дека од нив сè почесто се очекува одговор на секое прашање и дека се критикуваат доколку одговорите не им одговараат на некои.