Суд во Сеул денес го осуди поранешниот јужнокорејски претседател, Јун Сук Јеол, на 30 години затвор, по обвиненија дека наредил упади со дронови во Северна Кореја со цел да ги ескалира тензиите меѓу двете земји, пренесува „Анадолија“.

Централниот окружен суд во Сеул утврдил дека Јун ги наредил операциите со дронови во обид да се зголемат безбедносните тензии и да се создаде изговор за воведување воена состојба во декември 2024 година.

Судот го прогласи Јун за виновен за помагање на непријателот, за злоупотреба на службена положба и за попречување на остварување на правата, наведувајќи дека најверојатно биле откриени воени тајни откако еден дрон се урнал во близина на Пјонгјанг.

„Со цел да се создадат услови за воена состојба, обвинетиот одлучил да користи воена тактика на психолошко војување за да ја испровоцира Северна Кореја и да предизвика реакција, а потоа да ја искористи за да предизвика вооружена провокација, како локален конфликт, или да создаде ситуација на национална безбедносна криза поради зголемени воени тензии“, соопшти судот.

Доживотен затвор за поранешниот јужнокорејски претседател – Избегна смртна казна

Се наведува дека овие дејствија претставуваат предавство на очекувањата на граѓаните дека претседателот и министерот за одбрана ќе ја користат воената сила само за легитимни цели, додавајќи дека зад операцијата стоела лична мотивација.

Јун претходно беше осуден на доживотен затвор во февруари за водење бунт преку неуспешниот обид за воведување воена состојба, кој траеше само неколку часа пред Националното собрание да гласа за негово укинување.

Тој се соочува со вкупно осум судски процеси поврзани со обидот за воена состојба, со наводна корупција на неговата сопруга и со смртта на еден маринец во 2023 година.

Јун беше формално отстранет од функцијата во април 2025 година, откако Уставниот суд едногласно ја потврди неговата импичмент одлука поради прогласувањето воена состојба на 3 декември 2024 година, што доведе до вонредни претседателски избори.

Поранешниот јужнокорејски претседател осуден на пет години затвор за воведување вонредна состојба