Подобра и од варено вино: Рецепт за топла сангрија – совршена за празничните дружења!
Сангријата е популарен шпански коктел кој традиционално се подготвува со црвено вино, сечкано овошје и мала количина жесток пијалак, најчесто бренди. Состојките се мешаат и се оставаат да отстојат во фрижидер за да се продлабочи вкусот, а потоа се служат разладени во топлите летни вечери, пишува „Пун куфер“.
Препорачано
Но, дали знаевте дека овој пијалак има и своја зимска верзија? Врелата сангрија е збогатена варијанта на класичното варено вино и претставува совршен избор за празничните декемвриски дружења.
Потребни состојки:
- 750 мл овошно црвено вино
- 350 мл јаболков сок
- 60 мл бренди
- 60 мл мед
- 4–5 каранфилчиња
- 2 стапчиња цимет
- 1 ѕвездест анасон
- 1 јаболко
- 1 портокал
Подготовка:
Во тенџере истурете го јаболковиот сок и додајте ги каранфилчињата, циметот и ѕвездестиот анасон. Во сокот изрендајте и малку кора од еден портокал. Гответе околу 30 минути на тивок оган за да се ароматизира течноста.
Тргнете го тенџерето од оган и оставете сокот малку да подолади, па додајте го медот и бренди. Мешајте додека медот целосно не се стопи.
Процедете ја течноста низ цедалка. Во чаша за сервирање ставете неколку тенки кришки јаболко, прелијте со една третина од ароматизираниот сок и дополнете со црвеното вино. Послужете веднаш.
На здравје!
