Среде сезоната на грип и настинки, многумина се враќаат на проверените и вистински класици – првенствено пилешка и супа од домати, топли јадења кои се загреваат и лесни се за јадење дури и кога немате апетит.

Меѓутоа, која од овие две супи е всушност поздрав избор? Одговорот не е едноставен, бидејќи нивниот хранлив состав може многу да варира: од лесен и хранлив оброк до вистинска калорична бомба полна со сол и масти.

Диетичарките Вандана Шет, специјалист за растителна исхрана, и Мишел Раутенштајн се согласуваат дека двете супи можат да бидат добар избор, но дека состојките и начинот на подготовка се клучни, пишува „Њујорк пост“.

„Изберете верзии без додаден шеќер, со малку заситени масти и со ниска содржина на натриум. Секогаш кога можете, одлучете се за домашни или минимално преработени опции со свеж зеленчук, немасни протеини и храна богата со влакна“, советува Шет.

Пилешка супа – повеќе протеини, но и многу сол

Класичната порција пилешка супа со тестенини (околу една шолја) најчесто има помеѓу 100 и 150 калории, од 6 до 10 грама протеини, но и многу различни количини на натриум – од 500 па до повеќе од 1.500 милиграми, наведува Раутенштајн.

Домашната пилешка супа може да биде одличен избор бидејќи обезбедува немасни протеини, витамини од групата Б и цинк, кој е важен за имунитетот. Некои истражувања укажуваат и на тоа дека пилешката супа може да ги ублажи симптомите на настинка – како што е затнат нос, како и да има благ антивоспалителен ефект.

Проблемот се јавува кај купените и одредени „збогатени“ домашни верзии, кои често содржат големи количини сол, што може негативно влијание врз крвниот притисок.

Затоа, се препорачува да ги прочитате декларациите и, кога е можно, да изберете производи со помалку од 500 милиграми натриум по порција, проверувајќи дали содржат додадени шеќери, ароми и засилувачи на вкус.

Шет советува дека најдобра опција е пилешка супа со немасно пилешко и многу зеленчук додека кремастите варијанти, кои често имаат поголема содржина на заситени масти, треба да се ограничат или да се избегнуваат.

Чорба од домати – антиоксидантите се во прв план, помалку протеини

Супата од домати има различен хранлив профил. Според Шет, порција од една шолја содржи помеѓу 70 и 150 калории, во зависност од тоа дали е приготвена на база на зеленчук (бујон) или со павлака. Нејзината главна предност е високата содржина на ликопен, како и витамини А и Ц, кои се важни за здравјето на очите и имунитетот.

Од друга страна, супата од домати обично содржи помалку протеини отколку пилешката, а и кај неа натриумот може да биде проблем- особено во конзервираните верзии, каде што количината на сол често се движи помеѓу 400 и 900 милиграми.

Раутенштајн особено го издвојува ликопенот, антиоксидант кој се поврзува со намалени воспаленија, помал ризик од срцеви болести и засилување на имунитетот.

Таа додава и дека ликопенот се проучува поради неговата можна улога во намалувањето на ризикот од рак на простата, додека витаминот Ц и калиумот дополнително придонесуваат за здравјето на срцето.

Истото правило важи и овде: треба да обрнете внимание на солта и додадените шеќери. Кај пакуваните супи, се препорачува да се изберат оние во кои целите домати се меѓу првите состојки, бидејќи тоа обично укажува на подобар хранлив квалитет.

Која е поздрава?

На прашањето која би ја избрала, Раутенштајн дава предност на супата од домати, првенствено поради нејзината висока содржина на антиоксиданти – со напомена дека сè зависи од рецептот. Шет верува дека двете супи можат да бидат дел од здравата исхрана ако се изберат мудро.

„Пилешката супа може да биде подобар избор кога сакате повеќе протеини и подолго чувство на ситост“, вели Шет. Од друга страна, „супата од домати е богата со антиоксиданти и, иако содржи помалку протеини, лесно може да се дополни – на пример, со прилог богат со протеини“.

Заклучокот е едноставен: домашните варијанти се најздрави, бидејќи имате целосна контрола врз количината на сол, масти и додатоци. Кога купувате готови супи, клучно е да ги прочитате декларациите и да изберете производи со помалку натриум, без непотребни шеќери и со што е можно поедноставен список на состојки.