Судот во Лос Анџелес ја отфрли тужбата за сексуален напад поднесена против актерот Вин Дизел од неговата поранешна асистентка, Аста Џонасон. Судијата пресуди дека законот на Калифорнија не се однесува на наводниот инцидент што се случил во Џорџија во 2010 година, објави „Варајати“.

Џонасон ја поднесе тужбата во 2023 година, тврдејќи дека Дизел ја злоставувал во хотелски апартман во Атланта за време на снимањето на „Брзи и бесни 5“. Таа во тужбата тврди дека актерот ја притиснал на ѕид и мастурбирал пред неа.

Според нејзините тврдења, Дизел ја поканил во неговиот стан, ја натерал да легне на креветот, а откако избегала, тој ја турнал кон ѕидот, се обидел да ѝ ја соблече долната облека и ја натерал да ги допира неговите гениталии. Џонасон исто така изјавила дека само неколку часа по инцидентот, сестрата на Дизел ѝ се јавила за да ја извести за отказ, по само девет дена работа.

Судијата Даниел М. Кроули претходно отфрли четири од десетте точки од тужбата поради застареност, а во среда ги отфрли преостанатите шест поради недостаток на надлежност.

„Неспорно е дека наводниот сексуален напад се случил во Атланта, Џорџија“, напиша судијата во својата пресуда, додавајќи дека тужбата „не успева како прашање на закон бидејќи се претпоставува дека законите на Калифорнија немаат екстратериторијално дејство, освен ако законодавното тело изрично не наведе поинаку при донесувањето на статутот“.

Целиот случај инаку би бил застарен, но Џонасон се повика на законот за одговорност и прикривање на сексуален напад, кој во 2022 година ѝ дозволи на Калифорнија да ги обнови одредени случаи на сексуален напад што датираат од 2009 година. Сепак, судијата пресуди дека законот не може да се примени надвор од Калифорнија.

Адвокатите на Аста Џонасон најавија жалба против одлуката.

„Судот не пресуди за вистинитоста на наводите на г-ѓа Џонасон“, рекоа тие во соопштението. „Одлуката се заснова на правна техникалија, со која со почит не се согласуваме. Г-ѓа Џонасон има намера да поднесе жалба.“

Адвокатот на Дизел, Брајан Фридман, ја поздрави одлуката на судот, негирајќи ги наводите од самиот почеток.

„Благодарни сме што судот ја заврши оваа неоснована тужба“, рече Фридман. „Задоволни сме што ова прашање е целосно решено.“