Од утре стапува на сила мерката која ја изгласа Советот на Град Скопје воведува со која се забранува изнесување и депонирање отпад од 22 часот, а за оние граѓани и правни субјекти кои нема да ја почитуваат, ќе следуваат казни од 50 до 1.800 евра, соопшти новиот директор на ЈП „Комунална хигиена-Скопје“, Драги Митковски во интервју за Сител телевизија.

Мерката има за цел да донесе ред во управувањето со сметот и да ги спречи честите злоупотреби на контејнерите, особено од страна на угостителските и деловните субјекти.

Контролата ќе ја спроведуваат комуналните инспектори и редари, кои првпат ќе работат во три смени – 24 часа дневно. Во акцијата се ангажирани 20 инспектори и уште толку редари, кои ќе бидат во постојан обикол на терен.

„Штом одлуката утре биде објавена во Службен весник, целиот инспекторат преминува на тросменско работење. Секој прекршок ќе се санкционира веднаш на лице место“, изјави новоназначениот директор на ЈП „Комунална хигиена“, Драги Митковски.

Доколку се затекне поголема количина неправилно одложен отпад, ќе следи дополнителна контрола кај одговорните правни субјекти. Казните остануваат исти – 50 евра за физички лица, а од 1.300 до 1.800 евра за фирмите и локалите.

Надлежните сметаат дека со мерката ќе се спречи преполнување на контејнерите за домаќинствата и ќе се подобри ефикасноста на собирањето отпад во главниот град.