„Нов живот, нов Вардар“: Доаѓаат Талески, Остроушко, Георгиевски, се враќа Карачиќ..!?
Михајловски официјално потврди за „Спортмедиа“ дека ќе го превземе клубот без долгови, а Сергеј Самсоненко и натаму ќе ја има обврската да ги исплати играчите..
Од 1 јуни старо-нов газда на македонскиот и натаму актуелниот европски ракометен шампион на Вардар ќе биде Михајло Михајловски.
Михајловски официјално потврди за „Спортмедиа“ дека ќе го превземе клубот без долгови, а Сергеј Самсоненко и натаму ќе ја има обврската да ги исплати играчите до крајот на годинава.
Веќе се шпекулираат голем број на трансфери кои би се реализирале, а како што моментно стои ситуацијата во „магичната“ Википедија за РК Вардар, во сезоната 2020/21 би можеле да дојдат следните играчи..
Голманот Никола Митревски кој си замина од Еурофарм Пелистер, и така му се придружи на репрезентативниот колега Борко Ристовски, иако има информации дека би можел да се врати во Португалија.
Со „црвено-црните“ се поврзуваат уште неколку репрезентативци, левиот бек Филип Талески кој собра бундеслигашко искуство, негов последен клуб му беше Балинген, потоа Гоце Георгиевски кој досега ги бранеше боите на ЧСМ Букурешт, а тука е и талентираното десно крило од ППД Загреб, Ненад Костески.
Тука се наоѓа и името на белорускиот централен бек Артсјом Кулак од Мешков Брест, се најавува дури и враќање на еден од најзаслужните за двете европски титули на Вардар, Игор Карачиќ, кој би можел да го напушти Кјелце, а тука и неговиот сонародник Стипе Мандалиниќ кој беше дел од Фуксе Берлин.
Се спомнува и еден од најдобрите стрелци сезонава во ЛШ, Украинецот Владислав Остроушко кој што ги тресеше противничките мрежи во дресот на Еурофарм Пелистер.
А веќе долг период на оваа листа се наоѓа рускиот лев бек Дмитри Санталов од редовите на Чеховски Медведи.
Познато е веќе дека со македонскиот шампион се разделија Калифа Гедбан (Адемар Леон), Сташ Скубе (Мешков Брест) и Данил Шишкарев (Веспрем), од претходно тоа го направија Павел Атман и Даинис Кристопанс.
Кугис исто така најави дека ќе го напушти клубот, а се шпекулираат и заминувања на Дисингер, Кукуловски, Толедо и Сикошек Пелко. Од сегашниот состав би останале Ристовски, Кизиќ, Димитриоски, Дибиров, Чупиќ, Ќосевски, Стоилов, Калараш, Горпишин, Горбок, Мишевски, Карапалевски.