НАСА го одложи првото лансирање на програмата „Артемис“ со екипаж кон Месечината поради екстремно ниски температури што се очекуваат на местото за лансирање во Флорида, соопшти американската вселенска агенција. Летот на четворица астронаути кон Месечината и назад во рамки на мисијата „Артемис 2“ се планира за 8 февруари, два дена подоцна од првичната најава, пренесува „Еј-би-си“.

Поради студот, НАСА го откажа и тестот за полнење на горивото на ракетата висока 98 метри, кој требаше да се одржи за време на викендот. Клучната генерална проба сега е закажана за понеделник, акодозволат временските услови. Промената на термините значи дека НАСА има само неколку можни денови во февруари за лансирање, а ако и тие се пропуштат, мисијата ќе се помести за март.

„Секое дополнително одложување ќе доведе до поместување од ден во ден“, соопшти НАСА.

Функционерите велат дека греаачите ја одржуваат капсулата „Орион“ на врвот на ракетата на соодветна температура, додека системите на ракетата се приспособуваат на студените услови. Командантот на мисијата, Рид Вајзман, и останатите членови на екипажот сè уште се во карантин во Хјустон, а нивното доаѓање во Вселенскиот центар Кенеди е сè уште неизвесно.

Ова ќе биде прво испраќање на астронаути кон Месечината по повеќе од 50 години, откако мисијата „Apollo 17“ во 1972 година ја заврши оригиналната програма за истражување на Месечината.

Америка во рамки на програмата Apollo од 1969 до 1972 година стана првата и единствена земја што испрати луѓе на Месечината. На нејзината површина слетаа 12 астронаути. Мисијата „Артемис“ е именувана по старогрчката божица Артемида, близначка сестра на Аполо, по кого е именуван најуспешниот вселенски програма.