Најдобрата светска тенисерка на 25 години ја заврши кариерата
Прворангирата на ВТА листата Ешли Барти од Австралија на 25-годишна возраст на општо изненадување реши да се пензионира.
Иако се очекуваше Австралијката да доминира во наредните години, тоа нема да се случи. Барти, инаку, е актуелен шампион на „Австралија опен“, а лани го освои „Вимблдон“, односно „Ролан Гарос“ во 2019 година.
– Среќна сум и подготвена да го направам тоа. Знам дека во овој момент во моето срце, за мене како личност, ова е правиот потег – изјави Барти.
Единствениот Грен слем кој Барти не успеа да го освои беше „УС Опен“, каде што нејзиниот максимум беше четвртото коло, во два наврати.
– Не бев сигурна како да ја споделам оваа вест со вас, па го замолив мојот добар пријател (поранешната тенисерка Кејси Делаква) да ми помогне. Благодарна сум за се што ми даде овој спорт и се чувствувам горда и исполнета. Ви благодарам на сите кои ми помогнаа. Секогаш ќе бидам благодарна за животните искуства што ги создадовме заедно – вели Барти која појасни дека има други цели во животот.
Нејзиниот учинок во кариерата е 305 победи и 102 порази, а заработила вкупно 23.829.071 долари.