Поранешниот австралиски тенисер Тод Вудбриџ смета дека во овие моменти е мала веројатноста на Австралија Опен да учествуваат тенисери кои не се вакцинирани против коронавирус.
Стартот на првиот годинешен грен слем турнир е закажан за 17 јануари идната година, и Вудбриџ смета дека тенисерите и тенисерките ќе мора да се вакцинираат доколку сакаат да настапат во Мелбург.

– Тешко дека Новак ќе може да настапи без да се вакцинира. Тој веќе беше позитивен на коронавирусот и веројатно е дека чувствува некоја посебна сила против тоа. Во останатиот дел од светот се прави тоа што се прави, и мислам дека Новак во некој момент ќе мора да се вакцинира – вели Вудбриџ.

– За вакцинацијата нема да одлучува Тениската федерација на Австралија туку владата на Викторија. Засега правилата се дека доколку Новак сака да дојде и да игра на Австралија Опен ќе мора да се вакцинира. Лично мислам дека тоа е добра работа. Веќе некое време на тенисерите и тенисерките им се потенцира дека вакцината е најверојатното сценарио доколку сакаат да пристигнат во Австралија.

Ѓоковиќ е актуелен шампион на Австралија Опен, а дополнителен мотив за настап во Мелбурн му претставува тоа што тој заедно со Рафаел Надал и Рожер Федерер имаат по 20 грен слем титули, а српскиот тенисер има дури девет триумфи на првиот годинешен грен слем.

– Бидејќи влогот за Новак е голем, мислам дека сериозно ќе размисли за вакцината. Сака да ги престигне Рафа и Рожер, а во Австралија највеќе победуваше. За мене би претставувало шок доколку не дојде во Австралија – додава Вудбриџ.