Премиерот Христијан Мицкоски на Светскиот економски форум во Давос учествувал во панел-дискусија на тема енергетика и впечатоците ги сподели на „Фејсбук“. Мицкоски вели дека потребите за струја во светот ќе растат со стапка повисока за два и пол пати и дека Македонија „нема да биде нем набљудувач“ на оваа состојба.

Мицкоски најави заживување на „можеби заборавените“ енергетски проекти, како хидроцентралите „Чебрен“, „Галиште“ и „Бошков Мост“.

„И тука, ние како Македонија, како држава, не смееме да бидеме нем набљудувач, туку треба да бидеме активен чинител и активен учесник и тука повторно треба да ги рестартираме сите оние можеби заборавени енергетски проекти од минатото, како што се Чебрен и Галиште, Бошков Мост и останатите. И да го понудиме потенцијалот за инвестиции во обновливи извори на енергија на голем број од инвеститорите кои покажаа несомнен интерес во дискусиите по завршувањето на панелот“, рече тој.