Државната комисија за спречување на корупција (ДКСК) денеска едногласно ја избра Маја Коневска за нов генерален секретар на Комисијата. Коневска во моментов е раководител на Секторот за стратешко планирање и интегритет во ДКСК.

Претседателот на Комисијата, Адем Чучуљ, на седницата на која беше разгледан предлогот за избор, истакна дека именувањето на генерален секретар е неопходно поради тоа што со неговото назначување за претседател му престанале претходните надлежности поврзани со оваа функција.

Адем Чучуљ едногласно изгласан за нов претседател на ДКСК

Образложувајќи го предлогот, Чучуљ нагласи дека Коневска е дел од Секретаријатот на ДКСК од 2005 година и има 20-годишно континуирано работно искуство во институцијата.

Тој додаде дека нејзиниот долгогодишен ангажман значително придонел за развојот на ДКСК, особено во областа на меѓународната соработка, соработката со граѓанскиот сектор и подготовката на клучни стратешки документи, вклучувајќи државни програми и национални стратегии, изразувајќи уверување дека Коневска успешно ќе одговори на предизвиците на новата функција.