По реакциите во јавноста, Град Скопје ги коригираше сликите на влезните билборди. Сепак, и по корекцијата, албанскиот јазик и натаму недостасува, реагира партијата ДУИ.

Според ДУИ „ова покажува дека станува збор за свесна одлука да се игнорираат албанскиот јазик и мултиетничкиот карактер на Скопје“.

„Во двојазичен град, исклучувањето на албанскиот јазик од официјалните натписи претставува тешка политичка и институционална провокација и прекршување на законот. ДУИ бара итна корекција на билбордите и поставување на албанскиот јазик, во согласност со законот и со реалноста на Скопје“, се вели во реакцијата.

Доколку законот не биде спроведен, велат оттаму, ќе ги преземат сите правни, институционални и демократски мерки „за заштита на албанскиот јазик и достоинството на Албанците“.

„Политичката одговорност за овој континуиран модел на игнорирање на Албанците паѓа врз ВЛЕН, кои со својата вазалност создадоа уверување дека интересите и правата на Албанците можат да се прекршуваат без никакви последици“, реагираа од ДУИ.

Билбордот направен со помош на вештачка интелигенција, кој го вклучуваше и Букефал со пет нозе, беше сменет по големите критики во јавноста, а скопскиот градоначалник Орце Ѓорѓиевски го опиша како „печатена грешка“ и воедно ја нападна опозицијата.

ВИДЕО и ФОТО | Билбордот со Букефал со пет нозе е сменет по критиките, Ѓорѓиевски вели дека тоа била „печатена грешка“