Нашите „спартанци“ со својата борбеност за секоја топка во квалификациите и сиот тежок пат што го поминаа изминатите години заслужија да се најдат во европскиот крем.

Потсетување, дека националната селекција ќе дебитира годинава на Европското првенство (13-29 септември), во Љубљана во рамките од групата Ц заедно со Словенија, Турција, Финска, Белорусија и Русија која е бранител на европската титула.

– Успехот е многу голем со пласманот на Европското првенство, но секако не одиме да се предадеме таму, туку да се докажеме дека вредиме. Имаме добра група, можеме да играме скоро против сите, освен Русија и домаќинот Словенија. Се надевам на освојување на третото или четвртото место и да одиме понатаму – ни изјави македонскиот одбојкарски репрезентативец, Александар Љафтов.

Секако избраниците на селекторот Никола Матијашевиќ до стартот на 31. континентален собир освен преку тренинзите, формата во наредните три месеци ќе ја темпираат и со одигрување на контролни натпревари.

– Ова лето ќе биде многу долго и напорно. Подготовките ќе се одвиваат во два циклуси, првиот од 2 до 22 јуни во Скопје, а вториот од 14 јули до крај. Секако, ќе имаме и тест натпревари, со учество на турнирот „Чајка“ во Скопје, ќе одиграме и пријателски мечеви со Австрија. Очекувам доста контролни средби до почетокот на ЕП – додаде Љафтов.

Според најавите на традиционалниот 43. меѓународен турнир „Бранко Хаџи-Иљоски Чајка“ ќе се организира на 30-31 август, а ќе учествуваат уште селекциите на Украина, Бугарија и Белгија.

Како што е веќе познато, првиот дуел на евро-шампионатот ќе го имаме на 12 септември против Финска.