Крадец заспал во стан во рускиот град Благовешченск откако го ограбил, а сопственичката го нашла во таква состојба откако се вратила дома од работа, соопшти Одделот на Министерството за внатрешни работи на Амурската област, пренесува „Медиум“.

Жителка на Благовешченск пријавила во полиција дека, по враќањето од ноќната смена, во својот дом пронашла непознат маж.

„Се покажа дека крадецот влегол во куќата низ прозорецот во текот на ноќта, со намера да изврши кражба, знаејќи дека сопствениците не се таму. Осомничениот ги спакувал телевизорот и моторната пила во чантите, но, претпоставувајќи дека сопственичката ќе биде отсутна долго време, решил да се одмори и заспал. Сопственичката на куќата го затекнала во таква состојба кога се вратила од работа“, се наведува во извештајот.

Полицијата го привела осомничениот за обид за кражба во станот.

Станува збор за 45-годишен локален жител со претходно криминално досие за кражби и трговија со дрога.

Против него е покрената кривична постапка, а руските медиуми потсетуваат дека обидот за кражба извршен со нелегално влегување во дом носи затворска казна до шест години.

Како превентивна мерка, на крадецот му е дадена писмена обврска да не го напушта местото и да се однесува соодветно.