Ковачевски: Го осудувам каменувањето на македонскиот клуб, да се пронајдат и санкционираат сторителите
Премиерот Димитар Ковачевски „најостро го осуди вандалскиот чин“ на каменување на Македонскиот клуб „Никола Јонков Вапцаров” во Благоевград.
„Каменувањето на македонскиот клуб „Никола Јонков Вапцаров” во Благоевград е чин на вандализам кој најостро го осудувам. Ваквите активности не соодвествуваат на договорената политика за унапредување на добрососедските односи, взаемното почитување и пријателство меѓу две соседни држави, наведе Ковачевски во објава на својот Фејсбук профил.
Тој порача дека очекува во најкраток можен рок, институциите во Бугарија да ги најдат сторителите и соодветно да ги казнат.
„Очекувам од страна на надлежните институции во Бугарија во најкраток можен рок да се пронајдат и санкционираат сторителите и да се осуди вандализмот. Северна Македонија во духот на европските вредности, ќе продолжи со заложбите за зацврстување на дипломатската и позитивна агенда меѓу Северна Македонија и Бугарија“, додава во објавата премиерот Ковачевски.
Претходно и политичките партии Левица и ВМРО-ДПМНЕ го осудија демолирањето на македонскиот клуб, а осуда стигна и од претседателот на Македонија Стево Пендаровски.
Каменуван македонскиот клуб „Никола Вапцаров“ во Благоевград
