Алијанса за Албанците денеска обвини дека коалицијата Вреди наместо да се бори против непотизмот, станала негов корисник, тврдејќи дека државните институции се користат за вработување на роднини и блиски лица на функционери.

Во партиското соопштение се наведува дека претставниците на Вреди, како што велат, „во замена за функции и привилегии“ молчат за прашања што се однесуваат на положбата на Албанците, употребата на албанскиот јазик, правичната застапеност, Законот за игрите на среќа, полагањето на правосудниот испит на албански јазик и евроинтегративниот процес.

Како пример, од Алијанса за Албанците го посочуваат именувањето на Ариф Муса, татко на пратеничката и потпретседателка на ВЛЕН, Мимоза Муса, за член на Надзорниот одбор на Развојната банка на Северна Македонија, иако е пензионер.

Во соопштението се потсетува дека Ариф Муса, како поранешен член на Државната комисија за спречување на корупцијата, претходно се залагал за преиспитување на именувања во случаи кога постоеле сомнежи за непотизам.

Партијата го споменува и Нусрет Халити, кој, според нив, е внук на Ариф Муса и ја извршува функцијата директор на Агенцијата за електронски комуникации.

Алијанса за Албанците јавно прашува дали при овие именувања имало политичко влијание и дали постапките биле спроведени транспарентно и преку фер и конкурентна процедура.

Од партијата порачуваат дека, според нив, Вреди не се борел против непотизмот, туку само чекал можност самиот да има корист од таквите практики.