Коронавирусот ги поремети плановите на олимпискиот кандидат Емил Павлов: Крајно сум разочаран
Емил вели дека има неофицијални информации оти квалификацискиот турнир за учество на ЛОИ ќе биде одложен. Нашиот кандидат е во врвна форма да се избори за норма, но земјаќи го предвид сево ова, иднината е несигурна
Во целиот свет се откажуваат спортските натпревари, локални и светски, не е сигурно ни одржувањето на Летните олимписки игри во Токио летово. Еден од нашите сортисти што најмногу може да жали поради несреќниот тек на настаните врзан со коронавирусот е Емил Павлов.
Нашиот каратист е близу до остварување норма за учество на ЛОИ 2020, неговите настапи на турнирите од Премиерлигата го докажаа тоа. Две злата освои Павлов во релативно краток временски рок, во Москва и во Салцбург, што доволно зборува за неговата форма.
Емил требаше да ја брка олимписката норма на квалификацискиот турнир во мај во Париз, но неофицијално, како што вели самиот тој, и овој турнир ќе се одложи.
– Имам неофицијална информација дека ќе се откаже квалификацискиот турнир во мај. Не знам дали и кога ова ќе биде официјално, но, уште отсега можам да кажам дека сум разочаран. Бев во одлична форма и максимално мотивиран, полн со самодоверба. Но, против некои работи сме немоќни да се бориме. Како за мене така и за сите. Здравјето е пред се и мораме да го почитуваме препораките од надлежните за што побргу да се реши оваа состојба – вели Павлов, еден од спортистите во кои имаме најголеми надежи за ЛОИ.
Квалификацискиот турнир најверојатно нема да се одржи, барем не во предвиденото време. Но веќе е официјално познато дека се откажани и Европското првенство (ЕП), кое требаше да се одржи од 25 до 29 март, како и двата турнира од Премиер-лигата во Рабат и во Мадрид.
– Се уште не знаеме кои ќе бидат нашите следни настапи. Според неофицијални иинформации, до јуни нема да имаме настапи. Јас тренирам во домашни услови и чекам информации како ќе се развива ситуацијата – вели Павлов. Тој имаше клупски подготовки во Пехчево минатата недела, а требаше да продолжи со репрезентацијата на завршните подготовки. Но засега ништо од тоа.
Павлов е европски првак (од 2014 и од 2018 година) и двапати носител на бронзен европски медал и освојувач на многу други трофеи и награди.