Стручњаците истакнуваат дека времето кога се зема мултивитамин може да влијае врз апсорпцијата на одредени хранливи материи, но и врз неговата ефикасност. Затоа е важно да се знае како и кога да се земаат мултивитамините за организмот да има најголема корист од нив, пишува „Итинг вел“.

Мултивитамините се меѓу најпопуларните додатоци во исхраната. Се проценува дека речиси една третина од возрасните ги користат за да ги надополнат дневните потреби од витамини и минерали. Сепак, многумина се прашуваат кога во текот на денот е најдобро да се зема мултивитамин.

Нутриционистите Рајан Кипинг и Меган Пендлтон објаснуваат дека при изборот на мултивитамин треба да се знае дека постојат две главни категории: препарати кои содржат само витамини и мултивитаминско-минерални додатоци, кои се комбинација од витамини и минерали и се најчесто користени.

И двата типа обично содржат витамин Ц и витамини од Б-комплексот, кои се растворливи во вода, како и витамини растворливи во масти – А, Д, Е и К.

Како што кажува и нивното име, витамините растворливи во вода се раствораат во вода, додека витамините растворливи во масти имаат потреба од масти за подобра апсорпција.

Токму затоа овие витамини се важен фактор при одредување на времето кога треба да се зема мултивитаминот. За најдобра апсорпција, препорачливо е да се зема заедно со оброк кој содржи масти. Видот на мастите не е пресуден, па мултивитаминот може да се земе со храна како јајца, полномасни млечни производи, јаткасти плодови, салати со прелив на база на масло, сендвич со месо и сирење или со авокадо.

Не постои едно универзално време кое им одговара на сите. Нутриционистите нагласуваат дека најважно е мултивитаминот да се зема редовно, во време кое најмногу ви одговара и кое лесно ќе го запомните.

Многу луѓе ги земаат наутро со појадок, бидејќи така полесно се создава навика и се намалува можноста да се заборави суплементот. Утринската рутина често е постабилна и попредвидлива, што го олеснува воведувањето нови навики. Кипинг советува шишенцето со мултивитамини да се стави покрај намирниците за појадок како потсетник да се земаат секое утро.

Сепак, доколку редовно го прескокнувате појадокот, земањето мултивитамини на празен стомак може да предизвика стомачни тегоби, вели Пендлтон. Во таков случај, утринското земање можеби не е најдобра опција. Истото важи и ако мултивитаминот може да влијае на апсорпцијата на некој лек што го земате наутро.

Од друга страна, земањето мултивитамини навечер може да ја намали можноста за интеракции со лекови и други додатоци кои се земаат порано во текот на денот.

Најсоодветното време може да зависи од повеќе фактори: составот на мултивитаминот, животната фаза (на пример бременост и пренатални витамини), здравствената состојба, како и лековите што ги користите, бидејќи некои од нив можат да влијаат на апсорпцијата на витамините.

На пример, лековите за тироидната жлезда, како левотироксин, треба да се земаат одвоено од мултивитамините, бидејќи во спротивно може да се намали нивната апсорпција.

Иако многу стручњаци препорачуваат мултивитамините да се земаат наутро со оброк, всушност не постои едно идеално време за сите.

Најважно е тие да се земаат со храна (по можност со малку масти), редовно секој ден и по потреба со консултација со лекар, особено ако користите лекови или имате одредени здравствени состојби.