И покрај пазарните предизвици, автомобилскиот сектор покажува исклучителна отпорност, заклучи агенцијата Interbrand во својот последен извештај за највредните брендови во светот во 2025 година. Оваа водечка консултантска куќа за вреднување на брендови уште еднаш потврди дека „тојота“ е највредниот бренд за автомобили во светот.

Вредноста на „тојота“ се зголеми за два проценти и достигна 74,2 милијарди долари. Јапонскиот гигант не само што ги престигна „мерцедес“, БМВ и „тесла“, туку се пласираше на шестото место на глобалната ранг-листа на сите брендови. Пред него се само технолошките гиганти: Apple, Microsoft, Amazon, Google и Samsung, додека веднаш зад „тојота“ е „кока-кола“. Аналитичарите на Interbrand проценија дека растот на „тојота“ покажува колку доверба имаат клиентите во брендот, кој со децении гради репутација за сигурност, прифатлива технологија и глобално присуство- пишува Каматица.

Зад „тојота“, на второто место на највредните брендови на автомобили, „мерцедес-бенз“ беше пласиран со вредност од 50,1 милијарди долари. Сепак, во споредба со 2024 година, ова претставува пад од дури 15 проценти. „Мерцедес“ сè уште го држи 10-тото место во целокупната ранг-листа на глобални брендови. На третото место е БМВ, чија вредност е 46,8 милијарди долари, со пад од 10 проценти. Во целокупната ранг-листа на брендови, тој е на 14-то место.

Битката за престиж можеби се пресели на пазарот на електрификација, но „тојота“ е сè уште на врвот. Иако „тесла“ е сè уште во Топ 10 најпрестижни брендови на автомобили, тоа е исто така најголемото негативно изненадување во анализата. Пазарната вредност на „тесла“, во споредба со минатата година, се намали за дури 35,2 проценти и сега изнесува 29,5 милијарди долари.

„Интербренд“ истакнува дека причината за ова е зголемената конкуренција на пазарот на електрични возила. Тие исто така додаваат дека моделите на „тесла“ сè помалку се разликуваат од новите конкуренти како што се БИД, „хјундаи“, „киа“ и „фолксваген“.