Кога ќе се спомене автентична европска кујна, повеќето луѓе помислуваат на Италија, Франција или Шпанија, земји каде што вкусот, традицијата и страста кон храната се дел од секојдневниот живот. Сепак, новото истражување на туристичката компанија „Сага“ донесе изненадувачки пресврт.

Најавтентичниот гастрономски град во Европа не е во Италија, Франција или Шпанија, туку во срцето на Унгарија.

Унгарската престолнина станува нова европска, гастрономска ѕвезда

Анализата опфатила повеќе од 5.000 ресторани во дури 125 европски градови, а клучна улога одиграле рецензиите на Гугл. Се истражувало колку често во нив се појавуваат зборовите „автентично“ и „традиционално“, земајќи ги предвид и вкупните оценки на гостите. Резултатите покажале дека унгарската престолнина ги надминала сите познати гастрономски дестинации и ја освоила титулата – град во кој се служи најавтентична локална кујна во Европа, пишува „Тајм аут“ (Time Out).

Иако Будимпешта одамна е позната по своите термални бањи и живописните барови „во урнатини“ (ruin bars), последниве години привлекува сè поголемо внимание и на кулинарската сцена. Градот може да се пофали со сè поголем број ресторани со Мишелин ѕвезди и бројни пазари на кои можете да ја пробате локалната кујна.

Гастрономијата на Будимпешта денес е синоним за фини вкусови и ароми, а во унгарската престолнина можете да уживате во јадења како што се традиционалниот гулаш и лангош, како и познатите палачинки Гундел полнети со рум, ореви и сочно суво грозје.

Според препораката на експертот на магазинот „Тајм аут“, Питер Кресвел, вреди да се посети ресторанот „Боркониха“ (Borkonyha) кој се гордее со Мишелин ѕвездата и е познат по својот модерен пристап кон традиционалните унгарски јадења. Подеднакво ценет е и „Росенстејн“ (Rosenstein), култно место кое со генерации го негува духот на семејното готвење и топлата, домашна атмосфера што ги освојува гостите од првиот залак.

Грчко пристаниште е на второто место, а во топ 10 се најдоа и неколку изненадувања

На второто место, веднаш по Будимпешта, е Пиреја, крајбрежен грчки град кој често останува во сенка на славните градови како Атина. Како најголемо пристаниште во земјата, овој живописен град е рај за љубителите на морски плодови. Менијата низ градот вклучуваат свежи школки, печен октопод и ароматични рибни супи, а оброкот е незамислив без традиционалните „лукумадес“ (loukoumades), златни топчиња од тесто прелиени со мед кои, според легендата, уште во античко време им биле послужени на победниците на првите Олимписки игри.

На листата на 10 најавтентични гастрономски градови во Европа, свое место најдоа и Виена, Краков, Прага, Валета, Варшава и Минхен, а на изненадување на многумина, десеттото место му припадна на Милано, што на Италија ѝ го донесе единствениот пласман на оваа листа.

Според истражувањето на компанијата „Сага“, листата на топ 10 најавтентични европски градови за храна изгледа вака:

1. Будимпешта, Унгарија

2. Пиреја, Грција

3. Атина, Грција

4. Виена, Австрија

5. Краков, Полска

6. Прага, Чешка

7. Валета, Малта

8. Варшава, Полска

9. Минхен, Германија

10. Милано, Италија.