Туристите се советуваат да направат една клучна работа пред да патуваат, бидејќи бројот на случаи на мошне заразната болест од викторијанското доба е во пораст во Велика Британија и во Европа. Здравствените службеници предупредуваат за мали сипаници, а избивања на болеста се пријавени во неколку европски земји, додека порастот на случаите во Англија поттикнува нови предупредувања за патниците, пишува британски „Експрес“.

Ирската здравствена служба (ХСЕ) издала предупредување за патување пред велигденските празници, повикувајќи илјадниците луѓе кои планираат да патуваат во странство да проверат дали се целосно вакцинирани против оваа болест. Службениците навеле дека постојат „тековни случаи и неодамнешните појави на мали сипаници во Европа и Обединетото Кралство“, па ги повикаа патниците да се запознаат со симптомите и да проверат дали ја примиле ММР вакцината (мали сипаници, заушки и рубеола).

– Сипаниците се вирусна инфекција што може да доведе до сериозни компликации. Тие се многу заразни и лесно се шират – изјавил портпаролот на ХСЕ.

Најновите податоци покажуваат дека покриеноста со ММР вакцина кај деца на возраст од 24 месеци е 87,6 отсто, што и понатаму е под целта на Светската здравствена организација од 95 отсто потребни за спречување на појавата.

Предупредувањето доаѓа во време кога случаите на сипаници повторно растат во Англија. Според најновите податоци од Британската агенција за здравствена безбедност (УКХСА), помеѓу 1 јануари и 23 февруари 2026 година, 158 случаи на сипаници се потврдени во Англија преку лабораториско тестирање.

Повеќето случаи се забележани кај деца под 10 години, при што Лондон го чинат две третини од сите инфекции.

Големото избивање на болеста во северен Лондон е причина за поголемиот дел од порастот, а најголем број случаи се забележани во Енфилд, Бирмингем и Харингеј.

Иако оваа година во Англија не се пријавени смртни случаи поврзани со сипаниците, здравствените службеници предупредуваат дека болеста може да доведе до сериозни компликации, особено кај малите деца и ранливите возрасни лица.

Сипаниците порано биле многу чести во Британија, пред програмите за вакцинација значително да го намалат бројот на случаи. Меѓутоа, намалувањето на стапките на вакцинација во последните години овозможило вирусот повторно да се појави.

ХСЕ предупредува дека сипаниците се „една од најзаразните болести“, што значи дека можат брзо да се шират кога стапките на вакцинација паѓаат под заштитните нивоа.

Симптомите обично се појавуваат околу 10 дена по инфекцијата и првично личат на лоша настинка.

Раните знаци вклучуваат:

– болки во телото
– течење на носот, кивање и кашлање
– болни, црвени очи чувствителни на светлина
– температура од 38 степени или повисока
– замор и губење на апетит
– мали сиво-бели дамки во устата

Препознатлив осип обично се развива два до четири дена подоцна, почнувајќи од лицето или вратот, а потоа се шири по целото тело.

Здравствените службеници велат дека секој што не е сигурен за својот статус на вакцинација треба да се обрати кај својот лекар, бидејќи ММР вакцината останува најефикасната заштита од сипаници.

ХСЕ, исто така, ги повикал семејствата да останат дома и да се обратат кај лекар ако се сомневаат во инфекција, предупредувајќи дека заразените лица треба да избегнуваат контакт со други освен ако не се целосно вакцинирани.

Како што се приближуваат велигденските празници и милиони луѓе се подготвуваат на летови во странство, здравствените власти ја повикуваат јавноста да провери дали нивните вакцини се ажурирани за да се спречи понатамошно ширење на болеста низ Европа.