Интервју Петар Богатиновски: Важно е да напредувам, посветен и со квалитетни тренинзи до победа!
Во автомобилизмот во принцип многу е важен ритамот во трката и да нема осцилации во секој круг – вели нашиот млад картинг возач.
Големите соништа се остваруваат со напорна работа, тренинзи и учење од самиот почеток. Картинг шампионот до 10 години, Игор Богатиновски (11) има желба еден ден да настапува и во светскиот шампионат, а воедно сон на секој картинг возач е да се биде дел од Формула 1.
Пет трофеи, три во српскиот и два во македонскиот шампионат, а исто така дојде и до вицешампионската титула во Централно Европската зона во 2018 година.
Секако на патот до успехот се потребни и средства за квалитетни тренинзи и што е многу важно да се напредува во кариерата. Овој месец во Белград (Србија) настапи во класата 2 Ротакс Мини Макс за натпреварувачи од 10-12 години, трка како дел од ЦЕЗ освојувајќи го третото место.
Од каде дојде љубовта кон трките?
– Љубовта кон трките се роди уште кога бев многу мал. Заспивав и се будев со филмот „Cars“. Буквално сè ми беше во знакот на Lighting McQween и бројот 95, постелнината, пижамите, несесерот, собата. Оттука е и големата желба за трки.
Кога ги имаше првите настапи и која е твојата најголема поддршка?
– Првиот настап го имав на точно седум години, на патеката Ада Хуја во Белград. Најголемата поддршка ми е моето семејство, посебно мојот татко (Игор Богатиновски), бидејќи тој е повеќекратен шампион во Автомобилизам и има познавање од овој спорт.
Овој месец исто така учествуваше на патеката „Ада Хуја“ во Белград, што се бодува за Централно Европската зона и го освои третото место. Колку си задоволен од настапот и колку беше силна конкуренцијата?
– Од настапот на Ада Хуја кој се бодуваше за ЦЕЗ не сум задоволен. Не поради фактот дека завршив на третата позиција, туку поради околностите. Моите конкуренти имаа континуирани тренинзи и трки, а јас бев само со два дена тренинг и тоа се одрази на оваа трка.
Кои се твоите најголеми досегашни успеси?
– Вкупно пет титули е мојот врв на успехот до сега. Три од нив се во српскиот шампионат, а две во македонскиот. Она што највеќе ме прави среќен е вицешампионската титула во Централно Европска Зона (ЦЕЗ).
Како изгледа еден твој обичен ден, дали сакаш и други спортови како рекреација, некое хоби..?
– Постојано тренинзи, подготовки, кошарка, фитнес, дружба со другарите, но тоа беше пред да се случи пандемијата. Сега е поразлично, сега наместо на патека, возам во симулатор, играм „Fortnite” со другарите on-line, читам книги, попладне возам велосипед како рекреација и нормално мала дружба во маало на дистанца.
Кои се твоите следни активности, настапи оваа година?
– Поради ситуацијата (со Ковид-19), годинава ништо не е 100% сигурно. Но, искрено се надевам дека ќе се појавам на трката во Jessolo во Италија која е во календарот на ЦЕЗ и е закажана за 11 октомври. А понатаму, ќе видиме..
Која е твојата најголема желба која што сакаш да ја оствариш во иднина на натпреварувањата?
– Најголема желба ми е да настапувам во светскиот шампионат, да имаме доволно средства како останатите картинг возачи со цел да ми биде обезбеден квалитетен тренинг. Сето ова е важно за да може полесно да се дојде до победа, а со тоа и да напредувам во кариерата. Нормално, сон на секој картинг возач е да биде дел од Формула 1.
Што според тебе треба да го краси еден картинг возач, што е потребно за да дојдеш до едно од најдобрите места на подиумот?
– Како и во секој спорт најважно е да бидеш посветен, да имаш дисциплина. Во автомобилизмот во принцип многу е важен ритамот во трката и да нема осцилации во секој круг, а за тоа се потребни тренинзи и посветеност.